Татарстанлылар коронавирусны ешрак йоктыра башлады

Татарстанда эш урынында яңа коронавирус йогышы белән зарарлану өлеше арткан. Бу хакта «Татар-информ» мәгълүмат агентлыгында узган матбугат конференциясендә Роспотребнадзорның ТР буенча идарәсе җитәкчесе урынбасары Любовь Авдонина хәбәр итте.

"Әгәр сентябрьдә көнкүрештәге контактлар вакытында – 47%, ә хезмәт коллективлары аша-44% зарарланган булса, хәзер, октябрь аенда, структура бераз үзгәрде: хезмәт коллективларында зарарлану 57% һәм көнкүрештә 33%», - дип билгеләп үтте спикер.

Любовь Авдонина статистикадагы үзгәрешнең предприятие һәм оешма хезмәткәрләренең "бархет сезоны"на туры килгән отпусклардан кайтуы белән бәйле булуын аңлатты.

Республика ведомствосы җитәкчесе эш бирүчеләргә Яңа коронавирустан профилактика буенча санитар-эпидемиологик чараларны үтәү кирәклеге турында искәртте.

«Хәзер ОРВИ сезонының дәвам итүен исәпкә алып, коллективларда микроклимат параметрларын үтәү буенча карарга кирәк. Бу да бик мөһим. Чөнки суыту - көчле вируслы респиратор инфекцияләре белән авыруның төп факторларының берсе. Шуңа күрә температура режимын шулай ук үтәргә һәм контрольдә тотарга кирәк", - дип ассызыклады Любовь Авдонина.

Элегрәк «Татар-информ» хәбәр иткәнчә, Роспотребнадзорның Татарстан буенча идарәсе республиканың дүрт шәһәре һәм бер районы хезмәт коллективларында санитар-эпидемиологик нормаларны бозу очракларын ачыклаган.