Әлмәттә машина йөртүчене үлем белән тәмамланган юл-транспорт һәлакәте өчен хөкем иттеләр

Юлда игътибарсызлык һәм тизлек режимын үтәмәү фаҗигага китерергә мөмкин. Әлмәт шәһәр суды үлем белән тәмамланган юл-транспорт һәлакәте турында карар чыгарды. Хөкем ителүчеләр эскәмиясенә бер предприятие хезмәткәре, ике бала атасы эләккән.

Камаз шоферы сәгатенә 25-30 чакрым тизлек белән хәрәкәт итә, аек була. Әмма сулга борылганда Кадилакның каршы юнәлештә 130 км/сәг тизлек белән чабуын исәпкә алмаган. Җиңел автомобиль йөртүче шунда ук һәлак була. Эшне Әлмәт шәһәр суды карады. Суд җавап бирүчеләр сыйфатында юл-транспорт һәлакәтенә юлыккан автомобиле булган оешманы да җәлеп итте.

Дәүләт гаепләүчесе хөкем ителүчегә 3 елга ирегеннән мәхрүм итү һәм транспорт чарасы белән идарә итү хокукыннан 3 елга мәхрүм итүне үтенгән. Бу таләп белән һәлак булган эштә катнашучының хатыны да риза була, аңа мораль зыянны миллион ярым сум күләмендә түләү турында гариза өсти. Гаепләнүченең эш бирүче вәкиле әлеге сумманы 100 мең сумга кадәр киметү һәм башка оешма белән бергә түләү авырлыгын бүлү турында үтенеч биргән.

Гаепләнүче, үз чиратында, аз сүзле була, ул тулысынча гаебен таный һәм зыян күрүчеләрдән гафу үтенә.

Тикшерү барышында аның һәлак булганны җирләүгә матди ярдәм күрсәтүе билгеле булды. Бу хакта аны яклаучы як әйтте.  Ул шулай ук судтан җинаятьнең саксызлык аркасында кылынуын исәпкә алырга кушты. Ир-атның уңай характеристикасы һәм хөкем ителмәве турында да өстәде.

Моннан тыш, хөкем ителүченең карамагында ике кечкенә бала бар. Судья барлык якларны да тыңлады һәм тәнәфескә китте. Аннан соң, барлык шартларны исәпкә алып, эш карарын чыгарды-ир 1,6 елга ирегеннән мәхрүм ителде, шулай ук 2,5 елга транспорт чарасы белән идарә итү хокукыннан мәхрүм ителде.

Һәлак булган ирнең хатынынң дәгъвасын суд өлешчә канәгатьләндерергә карар иткән, автомобиль хуҗаларына 500 мең сум күләмендә түләргә туры киләчәк. Гаепләнүчегә мораль зыянны түләттерү турындагы гаризада баш тартканнар.