Әлмәттә “ЭТНО территориясе” республика конкурсы узды

18 гыйнвардан 4 мартка кадәр Пионерлар йортындагы “Кванториум” балалар технопаркында “ЭТНО территориясе” республика конкурсы узды.
⠀
Һәр халык тарихында тел, фольклор, этник символика, гореф-гадәтләр, рухи-әхлакый кыйммәтләр иң яхшы кешелек сыйфатларын формалаштырган. Әлеге конкурсның максаты - Россия һәм Татарстан халыкларының мәдәни мирасын саклау. Читтән торып үткәрелгән этапта 127 эш катнашты.
⠀
Конкурска эшләр “Милли киемнәрдә курчак”, “Этноаксессуарлар”, “Заманча киемдә этномотивлар”, “Сәхнә костюмы” номинацияләрендә тәкъдим ителде. 
⠀
Конкурс программасы Әлмәт, Бөгелмә, Кукмара, Лениногорск коллективларының “Сәхнә костюмы” һәм “Заманча киемдәге этномотивлар” номинацияләрендә чыгышларыннан башланды. Катнашучылар дефиле, биюләрдә үз эшләрен күрсәттеләр, ә Лениногорск коллективы “Кар кызы” әкиятенең мотивлары буенча сәхнәләштерелгән тамаша белән сөендерде.
⠀
Шуннан соң педагоглар арасында тәҗрибә алмашу буенча мастер-класслар башланды.
Катнашучыларны “Республика мәктәптән тыш эшләр үзәге” өстәмә белем бирү дәүләт бюджет учреждениесенең I, II һәм III дәрәҗә дипломнары белән бүләкләделәр.