Әлмәттә балаларны яклау көнен билгеләп үттеләр

Элек бәйрәм Татарстан нефтенең 60 еллыгы исемендәге парк территориясе белән генә чикләнсә, быел күңел ачу программасы иртәдән алып берничә мәйданчыкта башланды. Төшке аштан соң нефть институтыннан 60лап балалар катнашуында иҗат коллективлары йөреше старт алды. Парад Ленин мәйданында тәмамланды, анда Әлмәт районы башлыгы Тимур Нагуманов чарада катнашучыларны бүләкләде, шәһәрнең барлык балаларын һәм әти-әниләрен бәйрәм белән котлады.

“Әлеге бәйрәмнең бөтен дөньяда билгеләп үтелүе зур мәгънәгә ия. Бу-балалар очраша торган проблемалар турында, аларның киләчәге турында сөйләшү һәм, әлбәттә, балачак ваемсыз һәм якты булсын өчен, барысын да эшләү өчен сәбәп. Безнең матур шәһәрдә иң бәхетле балалар яшәргә, алар аны тагын да яхшырак итәргә тиеш”, - диде Тимур Дмитриевич.

Ул билгеләп үткәнчә, бәйрәм җәйге каникулларның беренче көнендә уза. Ә ул балалар өчен елның иң шатлыклы чорларның берсе булып тора.

Бәйрәм вокал, хореография һәм инструменталь балалар коллективларының зур концерт программасы белән дәвам итте. Анда Әлмәтнең төрле милли диаспоралары вәкилләре дә катнашты.
Чараның күпсанлы кунаклары шулай ук драма театры артындагы мәйданчыкта ярминкәгә бара алдылар. Анда аттракционнар эшләде һәм  аниматорлар балалар өчен кызыклы тамаша күрсәттеләр. Өлкәннәр район эшмәкәрләренең товарлары белән танышты, ә балалар сабын куыклары тамашасында, конкурсларда, уеннарда катнаштылар.

Балалар һәм яшьләр эшләре идарәсе җитәкчесе Илнур Фәсхетдинов хәбәр иткәнчә, оештыручылар ел саен балаларны яклау көнен бәйрәм итүнең яңа форматларын уйлап табарга тырышалар.