Әлмәттә тыл хезмәтчәнен 95 яшьлек юбилее белән котладылар

11 ноябрьдә үзенең бөтен хезмәт эшчәнлеген нефть сәнәгатенә багышлаган хезмәт ветераны Виктор Дмитриевич Беляковка 95 яшь тулды.

Юбилярны Әлмәт муниципаль районы Советы Аппараты җитәкчесе Роза Әфләтунова, социаль яклау идарәсе башлыгы Рөстәм Гәрәев, «Татнефть» быраулау эшләре идарәсе һәм район ветераннар советы вәкилләре бәйрәм белән котладылар.

Роза Әфләтунова район башлыгы Тимур Нагуманов исеменнән һәм шәхсән үз исеменнән ветеранны җылы котлады.

- Без Әлмәттә озын гомерле кеше яшәве белән бик горурланабыз, ул туган як тарихының тере чагылышына әверелде. Сез халык хуҗалыгын торгызуда катнашкан, нефть чыгарган һәм шәһәр төзегән җиңүчеләрнең ныклы һәм батыр буыны вәкиле, - дип билгеләп үтте ул.

Истәлекле бүләкләр тапшырдылар. 

Виктор Беляков 1928 елның 11 ноябрендә Татар АССРның Зәй районы Онбия авылында туган. Сугыш елларында  колхозда эшли. 1948 елдан 1952 елга кадәр Совет Армиясе сафларында хезмәт итә.

- Бүгенгедәй хәтерлим, мин поезддан чыктым, ә анда зур хәрефләр белән белдерү язылган - укырга чакыралар. Шулай итеп мин нефтьче һөнәрен сайладым, - дип искә ала Виктор Дмитриевич.

Шул вакытта яшь егет Бөгелмә шәһәрендәге «Саратов-нефть» бораулау кадрлары мәктәбен тәмамлый һәм үзенең хезмәт эшчәнлеген «Татбурнефть»тресының 2 нче бораулау конторасында слесарь булып башлый. Виктор Беляков 34 ел туган предприятиесенә багышлый. Озак еллар нефть һәм газ скважиналарын эксплуатацияләү һәм разведкалауда бораулаучы булып эшли.

"Намус белән эшләдек, һәрвакыт нефть чыгару планын үтәргә омтылдык. Бу безнең өчен изге иде", - дип сөйли ветеран.

Нәтиҗәле эше өчен Виктор Беляков «Татнефть»  Әлмәт быраулау эшләре идарәсенең Мактау грамотасы, «1978 елгы социаль ярышларда җиңүче» билгесе белән бүләкләнә, «1981 елның һөнәре буенча иң яхшысы» исеменә лаек була. Аның фотосы «Татнефть» «Альметьевбурнефть»нең Мактау тактасына кертелгән.

Хатыны белән бергә алар өч бала тәрбияләп үстерәләр. Уллары да әтисенең һөнәрен сайлаган һәм «Татнефть» компаниясе системасында эшлиләр.

Олы яшьтә булуына карамастан, Виктор Дмитриевич мөстәкыйль, тормыштан шатлана, яңалыклар һәм шәһәр тормышы белән кызыксына. 

Фото: Әлмәт муниципаль районы башлыгының матбугат хезмәте