Фаҗига турында истәлек: Әлмәттә сәяси репрессия корбаннарын хөрмәтләделәр

30 октябрьдә, сәяси репрессия корбаннарын искә алу көнендә, Әлмәт халкы миллионлаган гаепсез зыян күрүчеләрне искә алу өчен сәяси репрессия корбаннары һәйкәле янына җыелды.

Меңнәрчә кеше атып үтерелгән, миллионнарча кеше физик һәм әхлакый җәзаларга дучар ителгән, ә аларның гаиләләре хокукларыннан мәхрүм ителгән һәм газапларга дучар ителгән. Район башлыгы Тимур Нагуманов, җыелучыларга мөрәҗәгать итеп, илебез тарихының фаҗигале битләрен истә тотарга кирәклеген ассызыклады.

«Без сәяси репрессияләр корбаннарына хөрмәт күрсәтәбез, аларны искә алабыз. Барлык авырлыкларга да карамастан, бу кешеләр яшәргә, эшләргә һәм иҗат итәргә көч тапканнар», - диде ул. Район башлыгы шулай ук репрессияләр турындагы хакыйкатьне саклауның мөһимлеген билгеләп үтте. Бу көнне сәяси репрессия корбаннарын искә алырга килгән кешеләргә рәхмәт белдерде. Әлмәт муниципаль районында сәяси репрессияләр корбаннары советы 1996 елның ноябрь аенда оештырыла, исемлекләрдә 79 кеше исәпләнә. Хәзерге вакытта иҗтимагый оешма 60 кешене берләштерә. Әлмәт сәяси репрессияләр корбаннары иҗтимагый оешмасы рәисе Әнисә Гәрәева шәһәрдә гаиләләре репрессияләрдән зыян күргән, бу куркыныч елларны кичергән кешеләр яшәвен искәртте:

«Күпләргә инде 80 елдан артык һәм без шул авырту белән яшибез. Тарихны төзәтеп булмый, бер генә нәрсә кала – бер вакыйга да, бер дата да, бер язмыш та онытылмасын өчен гаделлекне һәм законлылыкны торгызу», - дип ассызыклады ул.

Репрессияләнүчеләрне бер минут тынлык һәм һәйкәлгә чәчәкләр салу белән искә алдылар. Митингка килүчеләр ачынып һәм күз яшьләре белән үзләренең балачагын һәм яшьлеген искә төшерделәр.