Рөстәм Миңнеханов: "Covid-19 буенча авырулар санының иң югары ноктасына җитмәдек әле"

Татарстан әлегә коронавирусны профилактикалау белән бәйле чикләү чараларын хәл итә алмый, чөнки республикада авыручылар санының иң югары ноктасы узылмаган. Бүген бу хакта Татарстан Республикасы Президенты Рөстәм Миңнеханов Татарстан Республикасы Хөкүмәте йортында узган киңәшмәдә хәбәр итте.

«Авырулар санының иң югары ноктасына җитмәдек әле. Бу хакта Россия Президенты да әйтте. Мәскәүдән дулкын башка регионнарга китә. Шуңа күрә, кызганычка каршы, әлегә без чикләү чараларын хәл итә алмыйбыз. Мин рәсми рәвештә Татарстан халкына мөрәҗәгать итәм — болар барысы да сезнең сәламәтлегегез һәм якыннарыгызның саулыгы өчен эшләнә. Һәр инфекцияле кеше башка кешеләр өчен куркыныч", - диде ул.

ТР Президенты билгеләп үткәнчә, республикада күрелә торган чаралар коронавирус таралу куркынычын киметүгә юнәлдерелгән. "Белгечләр безнең пиктан ерак булуыбызны раслаган. Математика модельләре дә, төрле тикшеренүләр дә бар. Әмма без үзебезгә катырак булсак, югалтуларыбыз да азрак булачак", - дип аңлатты республика җитәкчесе.

Шуның белән бергә Рөстәм Миңнеханов Сәламәтлек саклау системасының яңа куркыныч янауга тулысынча әзер булуын, предприятиеләр, шәһәр һәм районнар дәрәҗәсендә кирәкле эш оештырылуын билгеләп үтте. «Кичә без Түбән Кама районында ике эре производство эше белән таныштык. Проблеманың җитдилеге аңлашыла. Мин барлык коллегаларыбызга да рәхмәт белдерәм. Хокук саклау системасына аеруча йөкләнеш зур: Эчке эшләр министрлыгы, Росгвардия һәм башка структураларга. Без күрергә мәҗбүр булган чараларның барысына да ошамавы аңлашыла", - дип ассызыклады республика җитәкчесе.