Әлмәтнең Усмановлар династиясенә күпләр рәхмәтле
Бүген - Гаилә көне. Әлмәттә язмышларын сәламәтлек саклау өлкәсе белән бәйләгән уннан артык гаилә бар. Усмановлар шуларның берсе.
Ортопед һәм травматолог Илгизәр Усманов һәрвакыт үз пациентларына хезмәт итәргә әзер кеше булган. Ул сыналган методларны гына куллану өчен түгел, ә яңаларын кертү өчен дә белемнәрен киңәйтү өстендә эшләгән. Ул умыртка баганасына гәүдәнең алгы ягыннан керү алымын уңышлы керткән. Нәкъ менә әлеге тема буенча диссертация яклап, Илгизәр Усманов медицина фәннәре кандидаты булган. Умыртка сөягендәге туберкулезны хирургик дәвалау, авыруларның эшкә яраклылыгын торгызу һәм дәвалау вакытын кыскарту өлкәсендә фәнни тикшеренүләр авторы ул.
Махсус медицина коралларының күбесен сызымнары буенча үзе ясаган. Илгизәр Усманов елына 366 операция башкарган. Хәзер аның эшен улы Ринат Усманов дәвам итә. 1997 елда Казан дәүләт медицина университетын тәмамлаганнан соң, ул бер ел “Татнефть” ААҖ һәм шәһәр медсанчастенда эшли. 1998 елда Әлмәт туберкулезга каршы диспансерның баш табибы вазифасына билгеләнә һәм аны 20 елдан артык җитәкли.
Югары квалификацияле табиб Әлмәт, Татарстан, Россия пациентларына умыртка баганасының үлек һәм туберкулез авыруларына меңнән артык операция ясаган.
Аның тормыш иптәше Раушания Усманова Әлмәт СПИД-үзәгенең баш табибы булып тора. Аларның олы уллары Илдус Усманов Казан дәүләт медицина университетында дәвалау факультетының 5 нче курсында белем ала. Кече улы Кәрим Усманов хәзер татар гимназиясенең 10 нчы сыйныфында укый. Ул да нәсел династиясен дәвам итеп, медицина юнәлеше буенча китәргә уйлый.
Следите за самым важным и интересным в Telegram-каналеТатмедиа