Әлмәттә теләгән һәркем үзенең физик әзерлек дәрәҗәсен тикшерә ала

Әлмәттә 2016 елдан башлап ГТО тестлары үзәге актив эшчәнлеген җәелдерде, анда нормативларны үтәргә һәм алтын, көмеш яки бронза билгесен алырга теләгән һәркем мөрәҗәгать итә ала. Оешма физик культура, спорт һәм туризм идарәсе белән тыгыз хезмәттәшлектә эшли, бу безнең район халкын сәламәтләндерү өлкәсендә яхшы нәтиҗәләр бирә.

Районның физик культура, спорт һәм туризм идарәсе башлыгы Дмитрий Бакалдин билгеләп үткәнчә, Әлмәт районы ГТО җыелма командасы бүген республикада иң яхшыларның берсе, ә комплексны дуслар яки гаилә белән теләсә кайсы шәһәр бәйрәмендә диярлек үтәргә мөмкин. Әмма, билге алу өчен  башта www.gto.ru сайтында теркәлергә кирәк  һәм анда шәхси кабинет булдырырга кирәк, анда шулай ук үз баскычыңны һәм аңа билгеләнгән нормативларны күзәтеп торырга мөмкин.

Хәзерге вакытта Әлмәт районы буенча мәгълүматлар базасында 50 меңнән артык кеше теркәлгән, аларның 45764 е ГТО комплексында катнаша. Бу елның ике кварталы эчендә безнең шәһәрдә яшәүче 184 кеше һәм сәламәтлекләре буенча мөмкинлекләре чикләнгән 76 граждан алтын билгеләр алды.

Дмитрий Бакалдин шулай ук нормативларны үтәүнең иң югары ноктасы җәйгә туры килә, чөнки, кызганычка каршы, хәзер Әлмәттә, ябык манеж булмау сәбәпле, һава торышы аркасында барлык теләүчеләрне дә кабул итеп бетерү мөмкин түгел, дип белдерде.

Хәзер районның авыл җирлекләрендә дә чаралар актив үткәрелә, бәйрәм атмосферасында 6 яшьтән алып балалар «яшь Гтошкалар» фестивалендә үзләренә знак ала, укучылар да үз-үзләрен тикшерергә килә. Дмитрий Бакалдин район халкының эшләүче өлеше дә үз сәламәтлегенең торышы турында кайгыртыр, дигән ышаныч белдерде. Ул искәрткәнчә, ГТО комплексы физик әзерлекне даими тикшерү, аны салмак кына төзәтү һәм хастаханәләрдән башка тулы тормыш белән яшәү мөмкинлеге булсын өчен махсус булдырылган.