«СалаваTIK» YouTube каналында «Күрсәт әле, үскәнем...» дигән яңа җыр тәкъдим итте

Бүген проектның YouTube каналында “Күрсәт әле, үскәнем...”  татар халык уен җыры дөнья күрде. 

Балалар дөньясы – бик җанлы, кызык дөнья. Кечкенәләр эшсез, хәрәкәтсез тора алмый. Берничә бала җыелдымы, шунда ук бер уен оештыру ягын карыйлар. Еш кына бу уеннар җыр белән үрелеп бара. “Күрсәт әле, үскәнем...” дә – сабыйларның  яраткан уен-җыры. Гадәттә, балалар түгәрәк ясап басалар, берәү уртага чыга. Калганнар аның тирәсендә күмәк җырлап әйләнеп, нинди дә булса күренешне күрсәтүен сорыйлар. Уртадагы бала кушылган эшне башкара. Кырыйдагылар: “Менә шулай, менә шулай”, – дип, ул эшләгән эшне кабатлыйлар.

“СалаваTik” проекты “йолдызлары”на исә хәрәкәтләрне табигать уяну белән эшкә керешә торган җитез, тырыш, хезмәт сөючән бал корты күрсәтә.  “СалаваTik”ларга кушылып җырлаучы балалар да нәкъ шундый: хәрәкәтчән һәм җитез, шул ук вакытта туган телләрен саклап клу өчен бик күп эш башкаралар.

“Балалар өчен “СалаваTik” проекты – зур мәктәп ул.  Сабыйлар бездә бик күп төрле осталыкларга өйрәнә: бииләр дә, җырлыйлар да”, – ди “Салават күпере” һәм “Сабантуй” журналлары баш мөхәррире Зилә Хөснетдинова. 

“СалаваTik” проекты Татарстан Президенты каршындагы телләрне саклау һәм үстерү комиссиясе ярдәме белән тормышка ашырыла. Проект кысаларында дөнья күргән биш җырны YouTube каналда 33 меңгә якын кеше караган. “Күрсәт әле, үскәнем...” җыры да үз тыңлаучысын табар дип ышанабыз.