Ринат Мөхәммәдиев: "Яхшы роман бармак калынлыгында гына булырга тиеш, диләр. Ә без кайвакыт кирпечкә кызыгабыз"

«Казан утлары» журналының мондый китап сериясе булдыруы өчен куанып яши идем. Бүген заманалар бүтән. Калын китаплар – китап киштәләре өчен. Хәзер бердәнбер буш вакыт – юлда, кеше транспортта барганда китап укый. Бу форматның киләчәге зур булыр дип уйлыйм. Дөньяның күп кенә цивилизацияле илләрендә яхшы роман бармак калынлыгында гына булырга тиеш, диләр. Ә без кайвакыт кирпечкә кызыгабыз, шуның белән ялгышабыз”, - диде Ринат Мөхәммәдиев.

Әлеге китап «Казан утлары» китапханәсе сериясендәге унөченчесе. Тәкъдим итү чарасына язучы һәм журналистлар, Ринат Мөхәммәдиевнең әсәрләрен яратып укучылар җыелган иде. Чараны филология фәннәре докторы, әдәбият белгече Әлфәт Закирҗанов алып барды.

«Татмедиа» акционерлык җәмгыятенең генераль директоры Шамил Садыйков “Казан утлары” сериясендәге китапларның яхшы сатылуын әйтте.

Ул әлеге проектның уңышын кечкенә форматта булуы һәм әсәрләрнең оста итеп сайлануы дип атады.

«Бу сериягә эләгергә зур-зур премия ияләре чират тора, ләкин эләгә алмыйлар. Димәк, аларның әсәрләре кызык түгел, укырга авыр. Ә монда төп ният – кешегә кызыклы булырга тиеш. Шушы авторның арасында Ринат Мөхәммәдиевнең дә булуы, әлбәттә, безнең өчен дәрәҗә. Безнең хыял – бу китаплар санын йөзгә кадәр җиткерү. Әгәр шушы форматта йөз китап чыгара алсак, бездән дә бай халык булмый», - диде Шамил Садыйков.

Тәкъдим итү чарасын «Татар-информ» онлайн күрсәтте. Китапны «Татмедиа» акционерлык җәмгыятендә һәм Татарстан китап нәшрияты кибетләрендә сатып алырга мөмкин.