Рөстәм Миңнеханов милли мәгариф турында сөйләде

Татарстан Республикасы Рәисе Рөстәм Миңнеханов еллык юлламасында милли мәгариф мәсьәләләренә дә кагылды. Ике дәүләт телен куллану өчен дә барлык шартлар тудырырга кирәклеген турында хәбәр итте.

«Туган телләрне сыйфатлы итеп өйрәнүне балалар бакчасыннан алып югары уку йортларына кадәр тәэмин итәргә кирәк. Гомумән, тел мохитен формалаштыру – муниципаль һәм дәүләт хакимияте органнарының төп бурычының берсе. Моннан тыш, ике дәүләт телен куллану өчен барлык шартларны да булдыру мөһим», - диде ул.

Шулай ук кадрлар әзерләү буенча да эш дәвам итә диде Рөстәм Миңнеханов: «Туган телләрне өйрәнү һәм туган телләрдә укыту өчен шартлар бар, кадрлар әзерләү буенча эш алып барыла. «Адымнар» мәктәпләре челтәре уңышлы эшли. Алар – милли мәгарифнең ресурс методик үзәге», - диде ул.

Рөстәм Миңнеханов Татар телен һәм Татарстанда яшәүче халыкларның туган телен саклау, үстерү мәсьәләләре буенча комиссиянең телләрне саклауга сизелерлек өлеш кертүен әйтеп үтте. 

«Хакимият органнары, иҗтимагый оешмалар белән 100гә якын уртак проект булдырылды. Әлеге чаралар татар телен генә түгел, республикада яшәүче башка милләт телләрен – рус, чуваш, удмурт, мари, мордва телен үз эченә ала. Бу эш милли мәгариф һәм мәдәният өлкәсе өчен олы әһәмияткә ия», - диде Татарстан Рәисе.

Чыганак